Var. Int. de compravendas e prezo por m² por CC.AA. de outubro 2024 a 2025

Fonte: Centro de Información Estatística do Notariado (CIEN)

Nota: Os datos ofrecidos proceden de operacións de compravendas, hipotecas e constitucións de sociedades realizadas concretamente en outubro de 2025.

 

A Coruña, 29 de decembro de 2025. En outubro de 2025, con respecto a outubro de 2024, a compravenda de vivendas volveu crecer en Galicia fronte a un descenso xeneralizado no conxunto de España. Nesta ocasión, o aumento de operacións na comunidade autónoma foi do 2,1%, moito máis reducido que en meses precedentes, pero por encima da caída media estatal do 1,9% interanual.

Os préstamos hipotecarios para adquisición de vivenda incrementáronse nun 12,6%, a terceira autonomía con maior crecemento neste capítulo.

Máis compravendas a maior prezo

En outubro efectuáronse na comunidade autónoma 2.755 compravendas de vivenda e o prezo medio foi de 1.180 €/m², un 2,1% máis caro que un ano antes, pero inferior ao incremento medio estatal do 6,7%.

Por tipo de inmoble, producíronse 1.816 compravendas de pisos, un 5% menos que no mesmo mes do ano anterior, e 938 de vivendas unifamiliares, un 19,2% máis. 

O prezo medio dos pisos aumentou un 11,1%, ata alcanzar os 1.584 €/m², e o das unifamiliares situouse nos 780 €/m², un 1,8% menos que un ano antes.

Por territorios, a compravenda de vivenda reduciuse en 10 comunidades autónomas e creceu en sete. Destacan os aumentos en Navarra (7,6%), País Vasco (4,7%), Galicia (2,1%), Andalucía (2,1%) e Castela e León (1,9%) e os descensos en Madrid (-13,8%), A Rioxa (-12,3%), Baleares (-7,6%) e Comunidade Valenciana (-4,0%).

En canto ao custo do m², o aumento nacional foi do 6,7% interanual. Os prezos encareceron en 16 autonomías, con fortes subidas en Cantabria (20,4%), Navarra (17,2%) e Asturias (16,4%) e baixadas na Rioxa (-20,5%) e Estremadura (-2,2%).

Aumento de préstamos hipotecarios

En outubro pasado concedéronse en Galicia 1.250 préstamos hipotecarios para adquisición de vivenda, un 12,6% máis que en outubro de 2024, e por encima da media estatal do 6,7%. 

A contía media destes préstamos subiu na comunidade autónoma un 18,5% interanual, ata alcanzar os 148.844 euros. 

Un 45,4% das compras de vivendas financiouse mediante un préstamo hipotecario, fronte a un 50,8% de media no conxunto de España. Ademais, a contía do préstamo supuxo na comunidade autónoma unha media do 76,1% do prezo, por un 72,5% de media española.

O número de hipotecas creceu en 15 das 17 autonomías, entre as que destacan Baleares (20,2%), Castela e León (13,2%) e Galicia (12,6%).

Crece a constitución de sociedades

Os datos do Centro de Información Estatística do Notariado tamén revelan que en outubro de 2025 constituíronse en Galicia 443 sociedades, o que supón un aumento do 8,3% interanual, fronte a unha media estatal do 8,1%. A creación de novas sociedades aumentou en 15 territorios.

 

Os datos dos últimos tres meses das series desta nota son provisionais ata dispoñer do 100% da información con que se elaboran estes informes.