A Coruña, 30 de xuño de 2026. En abril de 2026, con respecto a abril de 2025, a compravenda de vivendas caeu en Galicia un 23%, o maior descenso de todas as autonomías e o máis elevado na comunidade galega desde decembro de 2024.

Este descenso de operacións acompáñase dunha redución do 18,8% na concesión de préstamos hipotecarios para adquisición de vivenda e dun moderado encarecemento do 2,4% no prezo do m².

No conxunto de España, o comportamento do mercado tamén rexistrou caídas, aínda que menos pronunciadas: un 10,2% interanual en compravendas e un 6,3% nas hipotecas para vivenda, mentres que o prezo do m² subiu un 9,4%.

Menos compravendas e a maior prezo

En abril efectuáronse na comunidade autónoma 2.131 compravendas de vivenda e o prezo medio foi de 1.218 €/m², un 2,4% máis caro que un ano antes.

Por tipo de inmoble, a compravenda de pisos caeu na comunidade autónoma un 29,4% interanual (con 1.415 operacións), mentres que a de vivendas unifamiliares baixou un 6,3% (716 operacións). O prezo medio dos pisos subiu un 12,7% ata o 1.708 €/m² e o das unifamiliares só retrocedeu un 0,1%, situándose en 775 €/m².

O descenso das operacións inmobiliarias afectou a 15 das 17 comunidades autónomas, en especial a Galicia (-23%) e Cantabria (-21,7%), e só creceron en Castela-A Mancha (0,7%) e Estremadura (1,2%).

En canto aos prezos, encareceron en 16 delas, sobre todo en Asturias (24,2%) e A Rioxa (19,8%), e só diminuíron en Navarra (-3,9%).

Forte caída en hipotecas 

En abril pasado concedéronse en Galicia 1.056 préstamos hipotecarios para adquisición de vivenda, o que supón un descenso do 18,8% en comparación con abril de 2025, unha caída máis acusada que a media española do 6,3%.

A contía media destes préstamos aumentou na comunidade autónoma un 13,4% interanual, ata situarse nos 143.370 euros.

Un 49,6% das compras de vivendas financiouse mediante préstamo hipotecario, fronte a un 55,6% de media en España. Ademais, a contía do préstamo supuxo en Galicia unha media do 74,6% do prezo, superando o 72,4% da media española.

Os préstamos hipotecarios para a adquisición de vivenda só creceron en Cataluña (4,8%) e Castela-A Mancha (0,4%), e descenderon nas 15 autonomías, entre as que destacan as caídas de Cantabria (-27,1%), Navarra (-20,7%) e Galicia (-18,8). 

Baixa a constitución de sociedades

Os datos do Centro de Información Estatística do Notariado tamén revelan que en abril de 2026 constituíronse en Galicia 374 sociedades, o que supón un descenso do 18,6% interanual, unha baixada superior á caída media rexistrada no conxunto de España, que foi do 4,5%.

A creación de novas sociedades aumentou en sete autonomías, destacando as alzas en Estremadura (54,1%) e Asturias (25,3%), e diminuíu en dez, con Navarra (-21,0%), Galicia (-18,6%) e Castela e León (-18,1%) á cabeza.

 

Os datos dos últimos tres meses das series desta nota son provisionais ata dispoñer do 100% da información con que se elaboran estes informes.